2026年嘅世界，好似愈來愈令人睇唔明。政治撕裂、經濟不安，香港？算吧啦😒。離開神學院已經二十一年，做牧者做耐咗，我仲記唔記得自己最初點解要「落山」？好多時侍奉做做吓，好容易就踩入個無形陷阱，將所有精力放咗喺：維持關係、維持制度、維持聚會運作……。但當初領受召命，根本唔係為咗維持現狀，而係為咗回應上主。若果侍奉只剩下職位、責任或者一份糧，我哋可能已經行偏咗。
今天大部分會友都好期待牧師傳道、領袖可以俾到答案。有啲人都會問：「牧師，之後點行呀？」我心裡面嘅答案真係得四個字：「見步行步囉。」係咪冇睇法？或許係對信仰嘅誠實。除了上主，應該冇人知道所有答案，大家同意？上主好多時都係「腳前的燈」，照亮眼前嗰一兩步，而唔係一次過俾張完整地圖。
返嚟呢三年，真係有好多時刻，我望住個局面，心裡面大嗌：「真係死得喇😂，搞唔掂！」但係每次，當條路好似行到盡頭，上主都會話我知：「邊個要你搞掂？單嘢唔關你事，我搞嘅。」呢句話簡直係當頭棒喝。教會本來就唔係我哋建立嘅，自然都唔係靠我哋撐。好多時候，其實係我哋自己嘅「救世主情意結」。當你願意放低嗰份「一定要成功」、「一定要控制大局」嘅執著，反而先至睇到上主點樣做嘢，大家同意？
《約拿書》裡面嘅約拿，最緊張嘅唔係城裡面迷失嘅人，而係自己頭頂嗰棵等自己可以遮蔭、坐得舒服嘅蓖麻樹。今日教會裡面嘅傳統模式、熟悉制度、穩定聚會，其實都係我哋嘅「蓖麻」。我哋究竟係守護緊福音，定係守護緊自己嘅安全感？
如果再有人問我：「未來應該點行？」答案依然係：「見步行步。」甚至有時行到好攰、睇唔到前路，咁點呀？「行唔到咪企喺度囉；再唔係，直情瞓喺度等上主處理。」聽落真係有啲無賴😆，我始終認為：呢間教會唔係我嘅，呢個時代唔係我嘅，上主會攪掂嘅。我唔需要扮演救世主，我只需要盡忠努力咁行好眼前嗰一步。承認自己冇計，然後一步一步跟住主走 - 因為撐住成個大局嘅，從來都係上主，唔係我囉。
後記：鄭姑娘等埋妳😆小慧快啲返嚟😂
沒有留言:
張貼留言