有感而發：消失的Hello Kitty

離開教師的崗位準備全職入神學院前（廿多年前）的暑假，與太太同阿仔去過一次北海道。當時候去過一次富良野，今次再有機會重回舊地。

天氣好好、背景無變、環境依舊美麗，都係人頭湧湧（可能係周日的緣故），唯一唔同嘅係唔見晒啲Hello Kitty囉😩😨

昔日疫情去日本旅行，每個地點都必定有Hello Kitty與當地特色（物件、動物或圖像）融合的標誌，也是我必定會購買作留念。可是當復常之後，再次踏足卻發現到這些必買的標誌卻無聲無色地消失。今日富良野的精品店內，只能見到這些......

唔知乜嘢（其實係我唔識啫😂）

還有這個😉

歲月真無情（只係過咗幾年啫😕），點解會咁架😣 Hello Kitty竟然消失晒！唔通佢真係out咗，新一代唔再鍾意？剩返抵我呢個老餅.......so sad😆 最後，點都要堅持放返佢在不同位置打多啲咭，堅持✊撐😉 （不過真係有啲孤寂囉😂😂）

親愛的弟兄姊妹，昔日的光輝轉眼就變成暗淡（這也是虛空），人生也是這個樣子呢😎.......要過去的...終必過去，執著都係無謂，盡過力就可以，始終在神的手.....不過我都係繼續會like囉👍......

後記：執筆之時剛好是30/6，明天又係71........感恩的就是仍有精神及體力與師母一起繼續旅行，下次幾時再去好呢😘😎年尾前要稔稔去邊度......繼續尋找Hello Kitty😉😍

有感而發：想點啫？

上周四忽然有機會與老師傾下（傾咗個幾鐘），老師分享到侍奉中要有回應時代的需要，要有影響力…….要繼續努力……要think great，要……（太多嘢，已經唔係好記得添😂😂） 

離開神學院走到今天（明年已經20年），服侍了三間堂會，究竟有幾多影響力😆……真係主知道呢？到今天仍然數唔到做個幾多對婚前輔導？帶領過幾多人歸主？在香港及大陸講過幾多次聖經課（仍然有啲書卷未教過）？寫過嘅牧函同拍過嘅YouTube應該會知，因為Blogger同YouTube係有數字顯示😁但係絕對唔係乜嘢網紅囉😂

昔日希望在新約聖經多點認識，及後發現到自己的舊約唔得（準確啲叫唔識），開始在伯特利神學院跟黃天相教授學習，展轉又17年……只係知道自己識多咗啲，仍然有好多未攪清楚😖 看到的只係 “學海無涯”，冇乜可能到岸……. 但係都會繼續嘅！

過去一年多先後多位認識的肢體安息主懷，日前更知悉我母會的導師患病，心情一直都係沉重……或許對自己嚟講只係一個Deadline的提示，生有限…….只想到自己還有多少日子可以侍奉？餘下的日子要怎樣投放……

撫心自問，我是否真的不思進取？貪圖安逸？唔肯離開自己安舒區？冇為主（為自己？）求更大的事？常常問過自己有冇勤勤力力？有冇做好上主交付？今天在網上看到台灣張月麗的一個訪問，其中有一段說話：

來到熟齡階段，應該捨棄的3樣東西：

 1. 沒意義的飯局；2. 不愛你的人。3. 虛情假義的朋友

以及應該擁有的4樣東西：

 1. 臉上的自信；2. 心裡的善良；3. 背上的骨氣；4. 生命裡的堅強

張月麗：「算來我的大半輩子沒有什麼預先規劃，比較像是走到哪算到哪，走不下去就轉個彎，但遇到機會時善加把握，人生就能擁有屬於自己的精彩！」

你們同意嗎？

後記：應該是因著母親的事情最後次去辦理手續，可以暫時告一段落……

有感而發：一年又一年的約會

每逢六月都會預留時間返建道散學禮，當然係因為 "黃薰獎學金"。如大家有興趣知道詳情，可以瀏覽之前曾分享過的牧函。

• 有感而發：上班第21天遇上了建道散學禮
• 2022侍奉隨筆：我在這裡真好
• 2022侍奉隨筆：為免忘記的承諾

今天早上坐7:00快船入長洲，中環正落著大雨，到達後竟然停雨（係好熱添😩）。感恩仍然可以一口氣行完山頂道，不過都有小小勉強😰）......或許是悶熱🥵 （應該係😀除非唔係囉😂）到達學院門口，自然要打返張咭.......一切都好似冇乜轉變，不過又係那熟悉又有點陌生的感覺.......（好多熟悉的老師已經退休......）

剛剛踏進校園，就遇上了蔡sir（蔡少琪院長），他是我當年在學期間關心小組的老師。他邀請我到他的辦公室傾一陣（最後傾足個幾鐘）....... 今天仍有老師提醒、關懷，除了感恩🥹還是感恩.......散學禮中，蔡院長提到建道的一個建築物翟輔民樓，他提到沒有昔日翟輔民在長洲這建築物，沒有今天的建道神學院。（翟輔民牧師生平）

昔日在大時代之下，神學院要離開廣西梧州......前路茫茫之際，竟然可以重置於長洲小島山上這建築物。親愛的弟兄姊妹，當然不是單單因著這 "硬件"，也包含著人的參與及努力，當然還有 "傳承"，就是一代又一代的傳下去...想起我們這一代😊 ...... 每次在散學禮結束前，必定會唱 "要忠心" ...... 我們已受主教導，今要出發.....

每一次唱頌，每一次都提醒著.......今天我有否忘掉那初心、那執著........但我只係主的小工而已😁

後記：建道在梧州的舊址已經變咗旅遊境點.......有趣嗎🤔？

有感而發：我們走了出去...

在兩年前堂會開放之前，天泉堂的弟兄姊妹已經走出去......自2018起，堂會參與播道會兒童之家的服侍，轉眼又6年。從whatsapp群組看到一位弟兄的分享，希望轉載給大家知多一點......(余浩然執事的分享)：

好開心可以和大家一起在兒童之家事奉。

今晚分享中有好多感人嘅細節。比如見到孩子嘅成長、由唔肯開口到願意分享、同我哋越嚟越熟悉、甚至因各樣原因要離開家舍嘅不捨等等。似乎經過兩年嘅相處，我哋真係可以同孩子建立關係同信任，原來我哋簡單嘅事奉，真係可以對孩子產生影響，好感謝神。

見到孩子有改變嘅同時，神又透過兒童之家嘅服侍，有冇改變我哋自己呢？ 可能會唔會連我哋都成長左？值得大家諗諗神响我哋身上嘅作為。

神比我有機會同家舍孩子行一段路，我覺得自己好有福氣。雖然有時好平淡、面對細路嘅情緒波動自己有時都好攰，但每次見到大家一齊事奉，見到孩子成長，尤其係同佢哋分享信仰或者相關價值觀，都覺得好滿足好有意義。我哋教會可能會面對一些「大議題」，比如花墟重建。但諗深一層，無論搬唔搬、搬去邊，其實都只係過程唔係目的，唔係最重要。只要我哋重視人嘅生命，為著神嘅緣故願意為此付出，我相信先係真正重要嘅事情。

好似頭先Peter分享，知道孩子會掛住我哋、著緊我哋之後仲嚟唔嚟，同時我哋原來又會耐不耐諗起佢哋，甚至會為他們流眼淚。對於我哋可以有咁樣嘅關係，我真係覺得好開心 - 開心過討論搬唔搬搬去邊😬

2018開始時的拍攝

都想借個機會多謝張牧師。記得2018年我哋在當時傳道人林生帶領下，開始探索兒童之家嘅事奉，張牧師會好客氣咁提醒我哋要用時間耐心觀察、用時間慢慢聆聽，唔好心急，又從一開始已經教導我哋孩子嘅事奉唔係搞活動放煙花送物資，係長久嘅、以年計嘅，才可以建立關係。轉眼就六年了，多謝張牧師嘅陪伴同教導，願神親自報答你，保守你和家人嘅健康與前路。

今晚臨走前同美美姑娘講，睇吓十月之前可唔可以大家聚一聚，或者上我屋企食餐飯。之後再約😬

多謝大家一直嘅付出，希望大家明年都繼續一齊事奉啦！🙏🙏🙏

後記：一位弟兄送給我的書，他寫下：

常常提醒自己，唔好成為自己所討厭的人。共勉之。

有感而發：矛盾做運動

昔日在將軍澳返工既時候，為了方便出入，都係踏單車。去年返天泉，展轉又搬咗去旺角西之後，做運動的機會少咗（其實係冇）。雖然偶然會行路上落班，也曾去過伸展班（因要讀亞蘭文停咗😬），但始終有限，於是上個月開始做運動（準確一點係去做Gym）。

事緣係好耐之前見過營養師，佢話我肌肉量唔夠，再加上中咗covid之後體重下降後又未能重返幾多，年紀又有返咁上下，體力（體能）又每況越下.......（理由當然多多😘），有日忽然心血來潮，走咗去報名做Gym囉...... 

既然俾咗錢教練，自然唔會放棄（可能係唔想"蝕本"），每次都會全力配合😎......不過，次次都有想死的感覺。在教練督促下，每個動作都起碼要做 3 sets，每次都係 舉手/舉步 為艱......最後都會手軟同埋腳軟😓.......有次當教練話還有30秒，我話：唔係掛，30秒😝咁耐！話個秘密你知，每次都希望時間快啲過，快啲走人，快啲完就好喇.......😂

除咗運動之外，上次讀亞蘭文（之前讀希伯來文）都有這個感覺。開始的時候已經知道（老師的要求同自己的資質），每周背生字、背表、背例外的、做功課、測驗、考試，每次都想死、放棄.......當然係自己攞嚟，自己揀嘅....😩。為了想知道一啲自己唔掌握的，或許這就叫下苦功呢！親愛的弟兄姊妹，立志跟隨主豈不是這樣嗎？現實中好多嘢我哋都係唔想面對，唔好去理，唔好自找麻煩.......但那召命已交付，問題係我哋點去 "回應"......親愛的，揀咗就堅持到底！ 

後記：母親節時，應該係衝動（唔敢講聖靈感動），與在場肢體講，不如一齊在教會門口派埋啲花啦......有時候思前想後諗來諗去都唔會去做，就是那份傻勁，事就這樣成了......雖然成就係上主，然而祂卻邀請我哋參與其中......何況在路上有同伴😚

周末崇拜：差12門徒的改變

馬太福音第九章記載了耶穌講論到 “新酒在新皮袋” 的教導，引起了法利賽人與施洗約翰門徒的疑問，為甚麼？因為 “新” 的緣故？還是 “舊的” 不能去接受那 “新” 的呢？上主日分享到掃羅在大馬色路上遇見主的 “改變”，今個主日也提到亞拿尼亞的 “改變” …… 大家如有時間可以再看往後有關彼得在哥尼流事件中的 “改變”。親愛的弟兄姊妹，他們為何能 “改變”？是否因為 “耶穌” 或 “天使” 在異象中顯現就能改變？今天我們又會否需要見到異象，甚至是耶穌親自顯現才改變呢？或許從耶穌差派門徒的敘述中得著一些提示…….

馬太福音第九章結束的時候，耶穌對門徒的要求：（環球聖經新譯本）

35	耶穌走遍各城各鄉，在他們的會堂裡教導人，到處宣講天國的福音，醫治各種病痛、各種疾病。
36	他看見群眾，就憐憫他們，因為他們困苦無依，好像沒有牧人的羊一樣。
37	他就對門徒說：“莊稼多，工人少，
38	所以你們要祈求莊稼的主差派工人去收割他的莊稼。”

之後，福音書的作者雄第10章就是敘述了耶穌的差派："耶穌把他的十二個門徒叫來，賜給他們制伏污靈的權柄，可以趕出污靈，醫治各種病痛、各種疾病。"（10:1）

Καὶ προσκαλεσάμενος 親自呼喚ptc τοὺς δώδεκα μαθητὰς αὐτοῦ  他的十二門徒 ἔδωκεν αὐτοῖς 他曾給予他們 ἐξουσίαν 權柄 πνευμάτων ἀκαθάρτων 眾污穢的靈 ὥστε ἐκβάλλειν αὐτὰ 為了常常去趕出它們 καὶ θεραπεύειν 和常常去醫治 πᾶσαν νόσον 所有的疾病 καὶ πᾶσαν μαλακίαν.和所有的軟弱

句子中只有一個動詞 ἔδωκεν "他曾給予"，跟著作者在v.2-3介紹了12門徒的名字，v.3 繼而再指出："耶穌差遣這十二個人出去，指示他們說..."

Τούτους τοὺς δώδεκα 這些十二 ἀπέστειλεν ὁ Ἰησοῦς 耶穌曾差派 παραγγείλας αὐτοῖς 他曾吩咐ptc他們 λέγων, 常常說ptc

句子中同樣只有一個動詞 ἀπέστειλεν "他曾差派" ，作者告訴讀者 "侍奉" 所需的能力與權柄是耶穌的給予，門徒只是耶穌的代表（見證人），並不是自己......當然也不是個人的選擇呢！接著 v.5-15 就是耶穌對門徒的吩咐（其實係命令），祂要求門徒要按照祂的命令去實踐祂的使命。

親愛的弟兄姊妹，在新時代之下（新酒在新皮袋中），新的工作、新的需要當然很多，也許會涉及新的方法、新的一代參與其中。然而，我們會否像耶穌一樣看到禾場，繼而懇求上主差派工人出去。今天若沒有那份 "看見"，沒有那份 "著急"，我們又會否抗拒那些 "改變" 呢？常常記得2019年時任立法會議員陳健波提出他們那一代 "收成期" 的言論 ...... "不變" 或者更準確一點是 "不願接受那被改變的安穩"，原因是 "那安穩" 是得來不易，真的嗎？（有啲乜嘢唔係由上主厚賜給人呢？）

在耶穌一連串的吩咐之後，v.16耶穌提醒門徒："留心聽！我差遣你們去，好像羊進入狼群；所以你們要像蛇那樣機警，像鴿子那樣純潔。"

親愛的弟兄姊妹，那 "狼群" 是誰呢？祈求真理的聖靈常常光照我們的生命......


後記：執筆之時剛好是6月9日......求主垂顧 🙏

8/6周末崇拜 - 12門徒（太10:1-16）