有感而發：與話語相遇

今天在校友祈禱會，見到一班認識咗二十幾年的同學仔，一齊坐低聽大家分享近況。有人仲喺度讀緊博士，有人已經讀完，行緊自己嘅路。聽住佢哋喺學術上一路向前，其實我心裡面又冇話好想追學位，反而更肯定自己都幾清楚嘅方向（其中一項係懶😆）。

呢幾年，我去過唔同嘅神學院，上堂、旁聽、跟老師學習，都係想讀好本聖經，因而專注喺聖經原文上面。無論係聖經內的希伯來文、亞蘭文定希臘文，其實我嘅目標一直都好簡單——就係想喺最原本嘅文本入面，好好讀明白上主嘅話。  

對我嚟講，學習唔只係為咗知識多啲，而係想搵到一條路，喺有限嘅人生入面，可以一路繼續追尋真理。我唔係想去到學術嘅高峰（唔知係乜😜），而係希望自己對聖經多啲啲體會，可以陪住身邊嘅弟兄姊妹，一齊行一段信仰嘅路。

都盼望可以將呢幾年嚟一啲細細嘅領受，同大家分享。喺彼此交流之中，聖經內嘅古老文字（對大家係符號😂），成為我哋生命入面嘅光，同埋力量。