有感而發：始終都會到架

今次放假去自駕遊，我嘅角色係「副駕駛」，全程負責睇住 GPS。有時望住架車既導航，有時睇手機 Google Maps，又要幫手留意路面情況。不過，真正揸車、掌握方向盤嘅，始終係我身邊嘅司機。其實我唔識揸車，只係從旁協助，好多決定根本唔到我作主。有時真係會好迷惘：究竟應該盲信 GPS，定係相信眼前嘅路況？點樣喺兩者之間取得平衡，一啲都唔容易。

每次出發之前，我哋兩家人都一定會一齊祈禱。但祈禱並唔代表旅程一定會一帆風順，亦唔代表途中唔會遇到意外。有一次，我哋錯過咗一個路口，去唔到原本計劃要去嘅地方。當下大家都諗住搵地方調頭，點知兜兜轉轉之後，竟然去咗一個從來冇計劃過會到嘅地方。更令人驚喜嘅係，嗰度竟成為咗成個旅程其中一個記憶點。

人生好多時都係咁。無論我哋計劃得幾周詳、準備得幾充分，旅途中總會遇到意料之外嘅情況，唔係每一件事都可以按住自己嘅計劃進行。然而，正因為出發前已經將旅程交託畀上主，所以當計劃被打亂嘅時候，心裏反而多咗一份平安。我哋知道，真正帶領我哋前行嘅，唔係 GPS，亦唔係自己，而係一直與我哋同行嘅上主。

有時候，以為自己行錯咗路，其實未必真係走錯；有時放低對原定路線嘅執著，順著當下嘅處境繼續前行，反而會遇見上主早已預備好嘅風景。兜兜轉轉之後，我一直提醒自己：今次旅行真正嘅目的，從來都唔係非去到某一個景點不可，而係「放假」囉。

人生亦係如此。我哋好容易將焦點放喺一個又一個目標，以為去到某個地方、完成某件事，先算成功。但信仰提醒我哋，真正重要嘅唔係目的地，而係旅途中有主與我哋同行。大家同意嗎？

後記：2020年3月曾計劃去淡路島探Hello Kitty，經過6年多既轉接，始終都係會去到。