有感而發：交託之後、繼續前行

主日下午開完臨時會友大會，之後一直跟進啲手尾到晚上，成個腦袋真係天旋地轉。加上個人好似有啲作病，嗰晚瞓得好差。

到了星期一，繼續開足馬力處理一大堆電話同信息，真係疲於奔命。感覺到自己開始支持唔住，即刻食咗啲日本手信（成藥）頂住先，之後再去睇中醫執劑藥，不過個人仲係好懵。點知夜晚出街食飯，整個人散散地，竟然連身份證同回鄉證都跌埋！當下心情差到極點，因為唔見咗個心愛嘅 Hello Kitty 證件套。我沿路行返轉頭搵咗好多次都搵唔到，加上好似想落雨，最後唯有放棄。嗰陣心諗：唉，希望上主幫幫手啦。  

星期二一早，即刻衝去長沙灣報失兼補領身份證，回鄉證就要遲啲攪。之後又要馬不停蹄做埋嗰日嘅工作（當然包括主日單嘢啦）。嗰陣心情反而冇乜大起伏，因為真係太忙、太多嘢要處理。直到夜晚教完書，先至可以返屋企休息。  

星期三上午，師母準備飛台灣繼續做嘢，我都只能陪到佢一陣就要出門，又開始咗忙碌嘅一天。心情依然好平靜，因為手頭上嘅事（特別是主日嘅跟進）真係排山倒海。去到夜晚八點左右，見到電話有個未接來電（兩個鐘前打嚟），平時習慣都會打返過去，原來係旺角警署打嚟。起初我仲未反應過來，突然間醒起自己星期一唔見咗嘢，就問阿 Sir 係咪有關報失嘅事。佢話有人執到我嘅證件，叫我過去攞返。 

去到差館等咗一陣，阿 Sir 攞返啲證件畀我，仲問我：「做咩咁急去補領身份證呀？攞住特區護照出街都得啦。」我笑笑口話：「唔見咗咪去補返囉，好正常啫。」

呢件事真係令我好有體會。我哋身邊成日發生好多預計唔到嘅事，當知道自己搞唔掂嘅時候，自然就會祈禱仰望上主。我知道祂會聽，但祂不一定會完全照我嘅意思去行；而喺現實中，我亦有自己要盡嘅責任（就好似發現唔見咗就要去補領咁）。咁係咪代表我禱告得唔夠信心、唔夠恆切？其實我當時只係喺心入面，細細聲同上主講咗一句：「希望祢幫我啦。」既然講咗、交託咗，咁我就如常生活，繼續努力完成上主嗰日交託畀我嘅責任。

後記：請繼續為天泉堂祈禱守望。