有感而發：盡力令自己「隨時可被代替」

好記得之前嘅上司提醒過：安排放假，係工作嘅一部分。大家同意？

講真，每次放假（除咗純粹消滅假期），要交低啲工作俾其他同工跟，對我嚟講完全冇難度。原因好簡單，因為佢哋每一個都優秀過我、付出得比我多，而且佢哋真係辛苦過我。😂

社會嘅價值觀成日教我哋要努力成為「不可被替代」嘅人。但相反，喺上主嘅國度入面，我哋反而要盡力令自己成為一個「隨時可被代替」嘅人。喺教會服侍，根本冇邊個比邊個更重要。當我哋肯放手、唔再執著要掌控大局，就會明白到：我哋其實只係「上主作為嘅見證人」啫。事情順利，我哋知道係佢俾嘅恩典；遇到困境，就停一停，靜靜地睇吓佢想點囉😁。 

或者我哋只需要專注做好身邊嘅「小事」，至於嗰啲「大嘢」，從來都係上主親自出手做嘅——憑我哋有限嘅智慧，有時連諗都諗唔到囉😆。我哋只要忠心搞掂一啲睇落微不足道嘅日常就夠：可能係一句溫暖嘅問候、一次默默嘅陪伴、或者一個順服嘅舉動。把大事完全交託俾上主，但係一定要將啲小事盡心做好，呢個就係對上主最深切嘅信靠。大家同唔同意呢？

💡 送一個小小嘅領受俾大家：「如果時間被榨得太緊，我哋真係好難成為一個溫柔嘅人（我仍然要努力💪）。」生活一定要留白，當面對人哋嘅軟弱或者突然嚟嘅挑戰嗰陣，我哋先可以自然流露出從上主而嚟嘅恩慈同平靜。願我哋喺忙碌嘅奔波入面，都識得常常提醒自己：認得邊條路回歸上主嘅安息😎。記住做返一個溫柔嘅人，開開心心咁見證上主親自成就嘅每一件大事。 

所以話時話呢，每次放假我都放得好放心，因為我有一班咁好嘅同工！

後記：安排放假，唔單止係工作嘅一部分；學習安息，其實都係服侍嘅一部分。教會當然唔係靠我撐住，世界更加唔係靠我運轉（但會阻住個地球轉😆），而上主今日仍然坐喺寶座上......上主比自己更加可靠囉！ 😊