有感而發：原來有限期

結婚三十年，真係從來冇諗過，竟然會有一日，要同師母分隔兩地各自生活。

今年五月，佢忽然收到通知要調去台灣工作。除咗去旅行，佢以前未試過咁樣。另一樣大劑嘅，係佢啲普通話仲普通過我。當時只得嗰幾收拾行裝，憑我平時嗰種機動能力及回應速度，自然係即刻配合、陪佢過去落腳。但係當我要獨自離開返港，心裏突然湧起一陣好古怪的感覺。以前父母過身之後，這種古古怪怪的失落，往往只會在節日裡出現，我稱之為：每逢佳節怪怪地囉😑。

由五月到而家，整整五個月。睇怕這種日子仲要維持一段時間。雖然佢每個月都會抽空返港，但每次都係匆匆忙忙咁嚟，又急急忙忙咁走。這段日子，腦海常常浮現嗰句歌詞：「誰會珍惜當你還擁有，將要逝去總想挽留。」而家每次準備飛去台灣搵佢，心裏都會有一份期待；見到面嗰一刻，係發自內心的喜悅；但一到要離別返港，那份沉重同失落就特別明顯。

三十年來，兩個人一齊生活早就成了習慣，甚至覺得一切都係理所當然。以前或者偶爾會聽人講過，但直到今日，我先至真真實實體會到：原來婚姻同相聚，真係有期限嘅。傳道者在《傳道書》講得好：「凡事都有定期，天下萬務都有定時。」又話：「在日光之下，神賜給你虛空的歲月裏，當同你所愛的妻快活度日，因為那是你在日光之下勞碌得來的份。」更提醒我哋：「凡你手所當做的事，要盡力去做。」

或許婚前輔導除了「終身售後服務」外，每十年都要同佢哋做返個review😂。既然生命同時間都有限，只要今日仲有氣息，就要好好珍惜同另一半相處嘅每一刻，盡力去做手頭上可以做嘅事。如果唔係，他朝想挽留......，一定會好後悔。

後記：有一個主日，忙完晒啲嘢之後，突然諗到：阿仔喺日本玩緊，師母喺台灣，返到屋企都係得自己一個。諗吓諗吓，不如喺辦公室坐多陣。最後，坐到八點。然後慢慢行返屋企，沖涼，瞓覺。