有感而發：去而復返的恩典

2009年9月11日曾寫下的分享：

昨天馮明道同我講，要我今天幫佢預較錄影一套於下午4:45的卡通片，他告訴我他今天要補習，約四時回家，但係要做功課，因此沒有機會此卡通片！我聽完他講之後，明白個仔真係長大了，他一方面知道自己的優先次序，先做功課然後去玩，他又開始懂得預先計劃及安排事情，有ｄ老懷安慰 feel ！其實，每個人成長都有不同的階段與學習，有啲嘢唔係完全掌握在我們的手中，不過在過程中，我們可以盡上我們的本分，我們就不會後悔或有遺憾！

回望接近五年的事奉，我仍然感謝神帶領我來到這個大家庭中，大家讓這傻小子亂攪一通，哈！哈！真係辛苦你們！我要感謝太太無條件的支持，生命中遇到妳是上帝對我在世上最大的恩典，太太多謝妳！我要感謝我的兒子，他讓我在急速事奉中慢下腳步來，沒有他，我的事奉將會有更大的缺失！人生在世有幾多個十年，認識盧生近廿年，事奉中有了他，一切變得更美！

上帝，祢對我真係好，我要感謝祢！

今天（11/9）在高雄，無意中睇返十七年前寫落嘅一段分享，心裡竟然啲啲滾動。（備註：2009年寫下，2010年8月底離開後，2023年6月回來...）

當年嗰個會因為個仔識得做完功課先睇卡通就老懷安慰、仲識自嘲喺大家當中「亂攪一通」嘅傻小子，點會估到經歷過 2010 年嘅離別之後，十三年後上主竟然會叫我返返嚟天泉堂？轉眼之間，我哋又一齊侍奉咗三年幾。

十七年過去，真係好多嘢都變咗。昔日的少年人，都長大成人，甚至成為教會領袖；當年的馮明道，如今都大學畢業了；昔日一齊事奉嘅盧生，都去咗另一間堂會繼續服侍。最令我感恩嘅，係再次返嚟嘅時候，仲可以見返你哋：一群喺天泉堂經歷過咁多風浪，卻依然選擇留低堅持落去嘅人。

十七年，時間真係好長。我老喇，明年都拎得 2 蚊搭車，白頭髮多咗，頭髮又唔見咗一大堆。但係睇返轉頭，呢啲唔單止係歲月痕跡，仲有嗰份難得嘅情誼。多謝你哋當年（當然亦包埋今日）對我嘅包容（唔係老馮嘅😂），亦辛苦大家咁多年嚟對教會嘅守望同堅持。人會來來去去，侍奉嘅崗位亦會改變，但大家一齊走過嘅日子，絕唔會因為時間過去就消失。你哋話係唔係？ 

十三年後可以再返嚟，要好珍惜仍可以侍奉嘅年日。呢一切從來唔係必然，而係上主畀我嘅恩典。感謝上主，亦都多謝晒你哋。

後記：2026年9月11日，今日發生咗啲嘢，要堅持，為佢哋祈禱🙏......都要繼續放假。