給大家的信：退修會後嘅話

親愛嘅弟兄姊妹

剛剛結束嘅執事退修會入面，當被問到最近「最感恩係乜嘢」嗰陣，浮現喺我腦海嘅，竟然係 7 月初臨時會友大會。之前嗰幾個月，執事領袖真係奔波勞碌，中間雖然出現過兩個單位，但都各有不足，未能完全滿足到堂會嘅需要，加上賣方出價亦唔低。結果喺最後一刻，因著樓契嘅問題，天泉堂暫時未能同市建局做買賣，買新堂址嘅事亦唯有停一停。在我個人嚟講，我真係深信上主喺最後關頭叫停咗我哋囉😌。謝主隆恩🙏

我估佢係想天泉堂停一停、諗一諗 - 佢嘅心意到底係乜嘢？呢件事令我想起今個主日講道後嗰首回應詩歌 - 感謝神。當我哋一齊向上主唱出感謝，就係再次認定祂先係教會唯一嘅主。坦白講，呢幾個月處理埋咁多未接觸過、完全冇經驗嘅行政嘢，心裏面常常湧出一種「不務正業」嘅感覺。加上結婚 30 年，師母忽然要去台灣做嘢。估唔到去到呢個年頭，我竟然要試下同佢 Long D😂，生活真係突然多咗好多未知囉😑。不過好奇妙，我心中又真係冇乜嘢擔心。因為我知道，上主真係會「攪得掂」，我哋只需要靜靜地守候，睇下祂點樣引導。

退修會中，另一個問題係「最憂心啲乜」。我嘅心即刻飛咗去那些今日仲喺監獄入面嘅、剛被判刑嘅，同埋遠喺海外返唔到嚟嘅。心中流著淚，記掛住佢哋。無論教會嘅行政同堂址嘢有多忙，呢份痛，始終在心裏面。

在今次退修會中，最感受深嘅係：「侍奉從來唔係個人嘅事」。好感恩，天泉堂有一班盡心盡意嘅同工，仲有一班咁可愛、願意一齊撐嘅執事。搵堂址雖然暫時 Pause 咗，但上主嘅恩典從來冇停過。喺呢段「靜靜守候」嘅日子，願我哋一齊學習靜心等待，將教會嘅每一步，繼續交託喺我哋嘅上主手中。 

主的小工：馮錦鴻

後記：

• 為堂址與前路守候： 懇求上主親自引領天泉堂尋找堂址的步履，賜予同工及執事團隊靈敏的洞察力與平靜的心，在暫停與等待中明白並順服上主最美好的心意。
• 為同工執事與教牧家庭同心： 為盡忠的同工團隊、可愛的執事們禱告，祈求上主賜下健康的身心靈、美滿的家庭支持，並同心合意的服侍喜樂。