馮錦鴻小小分享: 有感而發：過去兩天的

入營的第一天（15/3），翻查Facebook紀錄，一年前的當日剛好是市建局宣告花墟道重建的計劃及凍結人口的日子。其實15年前的3月份，我與師母曾一起到方舟退修，期望尋求上主的指引，最後8月底就離開了天泉轉往城浸侍奉。至於16/3，11年前的當日是我離開後再次踏足天泉，原因是郭本恩牧師的追思會.......仍然記得郭靈欣弟兄當天分享到郭牧師對天泉關心.......

除了指定的項目（環節），昔日在內地的營會中，早上都會有早操的安排，估唔到在沒有刻意的安排下，惠芳姊妹帶領我們跳咗一小段讚美操......大家都十分投入，實在是精彩😃😂

一個營會能夠完成，實在要感謝籌委們不停的努力、敬拜隊眾人多次的練習、組長在營前的預備、眾人的投入參與.......最後，轉載了余浩然執事（讀經營籌委）的一段分享：

兩日一夜中，有好多感動人嘅事，都想趁有印象同大家分享下😊

⁠惠鶯姨話好開心可以參加，同我講以後最耐隔兩年要搞一次。
⁠⁠梅貞之前响教會同我講過，佢其實從來都唔鍾意去宿營，但今次佢都肯嘗試參加。佢仲分享話响聖經中有得著。
⁠⁠有位我剛認識嘅弟兄話佢其實信主卅幾年，但離神好遠，最近佢問神自己可以點樣重新開始。佢話响營入面搵到答案，好開心，同埋佢會報牧師嗰班主日學。
⁠⁠小組入面有兩父子，初信與未信，但都有好坦誠的分享。
⁠⁠我哋嗰組又聽到將軍好多關於自己、關於天泉生活嘅分享，平時好少呢啲機會。大家都好享受。

自己响唔同信息、詩歌入面都有提醒同感動。我同黃雅芝啱啱講起，有啲位都唔知點解自己心入面會有咁大反應，要再細心諗下。但其中奮興會信息較後部分牧師叫大家祈禱，好平常地講咗句「求主可憐我們」，嘩，我當刻眼淚就無端端流出嚟，真係好覺得自己好需要主嘅憐憫，唔靠主我乜都做唔到、乜都唔係，覺得自己好不配，一直嘥咗好多時間。

最後，想講以斯拉記入面話以色列民「如同一人」。可能我哋都覺得天泉離「如同一人」差十萬八千里，但其實我自己唔係咁諗。我哋今日可能真係未係「如同一人」，但我總覺得我哋有好多人都好願意去成為「如同一人」嘅一份子，而咁嘅人越嚟越多，離真正「如同一人」越嚟越近。詩歌話「到那天我們，就像做夢的人，聚集驚奇，神為我們行了大事」，我以前一直都往新堂址落成那一天去諗，但今次營會後覺得，神行令我們聚集驚奇嘅大事，更可以係令我們眾人因為神嘅緣故去作出改變，有一日天泉會眾「如同一人」，呢個可能仲有意義過天泉遷堂。希望神真係可憐我哋，幫助我哋，向呢個方向邁進。